داکر (Docker)
داکر (Docker) بیر توٚر Containerization اویقولاماسیدیر، Containerization ایشلتیم سیستمی سئویهسینده ایزولاسیون تکنولوژیسیدیر. بو تکنولوژی ایله قوللانیجی آلانیندا بیر ایشلم ایزوله ائدیلیر. ایشلملر Container ایچینده ایزوله اولورلار. هر کانتینری اولشتورماق اوٚچون بیر image قوللانیلیر.
ایمئیج ایله کانتینرین فرقی: بیر کانتینر، مموری اوٚزرینده اوْتوران و چالیشان بیر پارچادیر، بو پارچانین ایچیندهکیلری توصیف ائدن، ایمئیجدیر. یازیلیم دوٚنیاسیندا کیلاس و آبجکت کیمیدیر، ایمئیج کیلاس کیمی، کانتینر ایسه آبجکت کیمیدیر.
بو تکنولوژیه أن یاخین اولان virtualizationدیر، بعضی آچیلاردان بنزر، بعضی آچیلاردان فرق ائدرلر. virtualization یا دا ساناللاشتیرما تکنولوژیسی بوٚتون ایشلتیم سیستمی و حتی دونانیملاری ساناللاشتیریر، کانتینر تکنولوژیسی ایسه ایشلتیم سیستمیندهکی قایناقلاری پایلاشاراق ایشلملری بیربیریندن ایزوله ائدر.
کانتینرلرین ایچیندهکی ایشلملر، ایشلتیم سیستمین چکیردگیسینین (کرنل) اوٚزرینده چالیشیر، آما داکر، لینوکس چکیردگیندهکی cgroup و namespace ایمکانلارینی قوللاناراق کانتینرلری ایزوله ائدیر. داکر ایله ایشلتیم سیستمیندهکی قایناقلار داها ائتکیلی قوللانیلیر.
ساناللاشتیرمادا هر سانال ایشلتیم سیستمی/سانال ماشین اوٚچون RAM و CPU آیریلیرکن، داکرده توٚم قایناقلار اولاشیلا بیلیر و هر کانتینر ایستدیگی قدر قایناقلاردان قوللاناجاق و قوللانمادیغینی الینده توتمایاجاق.
هارادا ایشیمیزه یارار؟
ساناللاشتیرما قوللانیلان یئرلرین بیر چوخوندا قوللانیلا بیلیر، اؤرنک اولاراق بیر سونوجو (server) اوٚزرینده نئچه سایت چالیشتیرماق اوچون، نئچه سانال ماشین و نئچه آیپی لازیمدیر، داکر قوللاناراق بیر آیپی و بیر ایشلتیم سیستمی ایله نئچه وبسایت چالیشتیریلا بیلیر.
داکرین فایدالاری سادهجه ایزولاسیون و قایناقلاری پایلاشماق دئییل، اویقولامالارین گرکسینیملرینی (dependencies) داشیماقدا دا یاردیمچیدیر. بیر django اویقولاماسی دوٚشونون، اونا بیر سوٚرو فرئیموورک و کیتابخلیقلار قورماق گرکیر، آنا ایشلتیم سیستمینده قورماق یئرینه بیر کانتینرین ایچینده قورولور. هر کانتینر بیر پورت اوٚزرینده سرویس وئریر، بو سرویسلر ده بیر دومئینه باغلانا بیلیر.
میکروسرویسلرده ده یاردیمچیدیر، بیربیریندن باغیمسیز آما بیربیرینه سرویس وئرن ایشلملر، کانتینر ایچینده چالیشاراق، http کیمی بیر پروتوکول یاردیمی اله ائشیکدن گلن ایستکلره یانیت وئریرلر یا دا کانتینردن ائشیکده اولان سرویسه ایستک گؤندریرلر.